Es texto ê grindin ma el te velê ben a pena!
“NÃO FOI DFICIL PÂ QUEM ''M INJEITÀ”
Come tinha qu'ser, cada um defensor uvi sê cliente e, d'nôte, num d'aquês passeie d'da tardinha, ês dzê cumpanhêr de moda q'ninguém tva uvi: - "Bô cliente jà psù. 'M tem argumente pa pô-l na Cadeia na Soncente". Quel ôte respondê "vamos a ver isse". Mas, come manda a Lei, tchgá momente d'acariação na presença d'Juiz.
Peqnim era nominha d'Manel da Luz, rapaz de vinte ône, bnitim, jeitosim, trabalhador de confiança na propiadade de Nhô Benjamim Arroba. Ele ca mistia corrê pa trás de ninhum d'aquês mnininha paquem pra là ca tinha tcheu rapazim moda ele.
Puldina era más velha e q'sês 24 ône el'era mnina scegada, bnitinha, ma tempe tava tâ passá e home drête naquel terra era poque. De manera, qonde Peqnim encontrá-l ta vrá pa casa da tardinha, quaje q'scure, q'uns cumpra, ela tchá-l cumpanhá-l naquel camin sem mute gente. Isse foi um mau ideia porqê Peqnim jà câ parcê más.
Um semana dspôs, feride na sê alma, Puldina argui cêde, ela bsti sê rubinha más amdjor, pa fazê quel camim tê Povoaçom q'tava dura uns três hora. O que Peqnim fazê-l ca era brincadêra pa xqucê assim dum dia pa ôte. Ela tinha side um menina honrada que tive um storia sô ma um dsgraçode d'infer qonde îs tinha quinze ône, ma ainda ela tinha xpérança d'um vida drête qonde parcê-l um home q'juize.
Na Dmnistraçon, ela esperá tê q'senhor Julim recebê-l porquê assunte era de mute deliquedeza; era sô má ele e ele câ tava brincá q'coisas séria. Foi por isse q'Puldina intchi d'coraja, mesme q'vergonha na pele d'cara, ela tinha d'contá estória cuntecide: - Sr. Mnistrador, Peqnim abusou d'minha fréqueza, mlher ê parte fraca e ele sêbia o qu'ele tava a fazer.
Nô Julim oiâ logue q'aquile era assunte d'alçada pessoal d'Administrador qu'era ao mesme tempe Juiz d'Julgado; quer dizer, ele podia resolvê quel assunte sem passá pa Tribunal d'Soncente. Ainda por cima el'era um viciadim q'tava gosta d'uvi estória d'mal criaçon. Cuitode d'Peqnim! Sê cama já tava fêite!
Acontecê q'naquel altura dôs xtudante de Direite tinha binde d'féria e assim îs podia trabaiá aquel case come deve ser, moda num Tribunal na dvéra. Um d'aquis estudante era sobrim d'Benjamim Arroba e q'êle ôte era sobrinha dele Administrador. Ele mandá tchmàs e ele xcuï quem q'divia dfendê cada um: rapaz tava defendê rapaz e mnina tava defendê mnina num julgamente rápede. Is tava abri sala d'Administração, tude gente tava bem assisti e era como se fosse um xpetàcle naquel lugar e Governador tinha de ser informode.
Come tinha qu'ser, cada um defensor uvi sê cliente e, d'nôte, num d'aquês passeie d'da tardinha, ês dzê cumpanhêr de moda q'ninguém tva uvi: - "Bô cliente jà psù. 'M tem argumente pa pô-l na Cadeia na Soncente". Quel ôte respondê "vamos a ver isse". Mas, come manda a Lei, tchgá momente d'acariação na presença d'Juiz.
Ali tude gente fcá d'pé atrás porque Peqnim era piqnim e Puldina tinha uns trinta centimetre mais di qui ele. Aquis dôs defensor xpiá cumpenhêr, ês dzê q'sis butom "Como pode ser isso? Ela diz que houve uma violação e ela é maior que o rapaz".
Antom, depôs d'conversa c'Administrador, îs resolvê qu'tinha d'ser feite um reconstituição na lugar ondê qu'êsse abuse contecê. Qund'is îs tchgá lá, era num camim poque frequentóde, e lá tinha um arve inclinóde. Puldina, senhora de si, dzê foi li naquêl pé d'mote. Nhô Julim, grili oie, ele mandà-l posicioná, o q'êla fazê bem incôstóde moda qonde contecê quel stramontaçon.
Tude gente oià q'mâ mesme assim, cosa tava dficil de compreendê. Antom, Nhô Julim, cheie d'vice e curisidade, dzê Puldina "Mas isto continua a parecer impossível mostra lá como foi" e Puldina respondê:
- Não foi dficil pâ quem 'm injeità.
