DMING MUNZINHA MA CARLOS VEIGA
Dming Munzinha (ess nome é perkóza dum mon kel tem krôk, min séb sé é de nescênsa ou se foi elgun intempér ke pénhé’l). Bem, e’m tava te dzê kê dming é um óma lá de Pinhon, muit trebelhôdor, el te morá el sô, ma diza kel tem uns filha imbórcód.
Ne temp ke MPD era Govérr (sima diz Boltchôr) Carlos Veiga bé vzitá Pinhon, ondé kel tava ineugurá um p’décin de estrada (óh ke estrada pêdrêr na mund! dis kun bem te intendê nhó nome e’m otchés te ébri kel pdécin de kémin)
Enton, gentes de Pinhon já dxê dbergód tud pe caza de escola pe bé oiá Carlos Veiga (ne kel zona lá maioria era MPD ferrenho). Tud gent content te toká palma, tud gent k dente kóskód mod Carxvega tava nô zona.
Kónd srimónia kabá, gora é ôfronta mod tud kriston krê brasá, falá ou simplesment dá erói um monzada.
Dming, estrróxód moda kel é, el bé te da sfardana, el pasá tud gente pe frente etê txgá ne Veiga:
- Senhor Carlos Vérmes (ele era bom ne sê pertguês intxód): mim o ke’m tem pa dizer você é kê mim ê um pessoa sufrid! E’m te perzá d’un ójuda, porque mim e’m te terbaá de forma ingat. Tud dia é subir lêdera, descer lêdera, tud carga é pe’m krregá: cmida de bix, lenha, sóc de loróu moda um burr… tud intempér é pe’m tmá: sol, giada, xuva, frieza nó kósk de kébesa, vent e suôn… mim ja’m mi’n di te podê ke’s vida. Ese ponta de estrada ke já txgá etê ei ne kaza de escola, de nada te bem servi’m, mod mim nhé lida é la pe kes kébése. Tud dia e’m te sbir kébése moda um burr pertód…
E el continuá… bla bla bla bla, enkuént ese pessoal tá te esperá irritód, sis vez pa podê cumprimentá CarxVeiga, Premer D’mnistre!
