terça-feira, julho 14, 2009

BOCA DE KUÉRTE E MEI

Esse estôra eî ê friskin e el bem dirétêment dess mucin eî, Foi um comentário ness post eî, g'rinhêssim! El mendéme, jam postél!

.......

BOCA DE KUÉRTE E MEI
Por: Benvindo Neves


Enton ógora tché'm bem contób um pircid (esse ê um de kês pirraça ke nhé pé te contá, bo séb kel oma é um bocód busód. indê bem ke mi'n séí'l)

Nhe Chikinha era um viuva k tava vendê grog ma tóbóc. El era um ômor de moer, sem méldéd. Ma tembêm percósa de sê ingenuidéd tud gent tava tchucél déd no oi.

Um bél dia um flón amante de se pinguin bé lá comprá um kuértin. El tchgá ne moer el dze'l: Ó Chica bté'm la um kuért de kel éguinha de kana ke bo tem ei.

Chikinha já entrá prêdent, já’l fcá, jal fcá… depos d’uns minut el bem kun garrafa de 1 litro pérriba de mei de grog. Kun kérinha desinjetada el dzê esse oma:
- uá deskulpém ótróse, ja'm espiá kel medida dum kuért la predent ma kués ja'm pol de mon. Mi'n séb ógora kmenera k’um ti te bem m'dib esse cálce.
Óma e'n div més k fêzê, el voltá esprójód pe kel moer el dze'l:
- Ó Chica, e'n den prublema, oiá nhó boca é justin um kuért, diazá un descubri isso.
Chica: bo te né sério, criótura?
Quel flon: Sim om, é um m’dida sem rôzol.
Chica, sem pensá dos vez, estendê mon el dá oma garrafa. Kel estopôr eskencará goéla, revrá garrafa nó boca etê garrafa fcá séc russo.

Enton, moer, kum kérinha desenimód voltá pe kel estôpor el perguntél:
- Ó moço, ma bo’n inganá ne m’dida?
Óma, voltá kun cara estanhada el respondê: Oce t’otchá??? Cê oiá kê nhó boca e’n de kêstmá inguéne’m, se uvi???…

0 Comentários:

Blog Widget by LinkWithin